السلام على انتو
بدأت هذه السالفة بيوم خبل جان شوية و هو بصراحة يوم فكر ,,, نسيت جواريبي يم الحلاق (شنو؟) ,, و بيومها عطلت سيارتي عندي سايبا فور ويل الا صفرة ,, قصدي الا خرافية ,, و اضطريت اجيب جاهل صغير انطيتة 1500 و سحبها (خفيفة ما تسوة كرين) ,, بيومها اندك عليه التلفون
اني كلش شوية ما يندك عليه التلفون ,, لو امي اتريد اجيب صمون ,, لو ابوية ديتاكد امي وصتني اجيب صمون لو نست .. لو امي مرة لخ دتتاكد ابوية خابر حتى يتاكد انه امي خابرتني حتى اجيب صمون لو ابو الصمون نفسة يكلي تعال اخذ العلاكة عاد مو اهلك ثبروني ,, او ابو محل الخياطة مثلا يكلي الفانيلة خلصت (اي اني افصل فانيلات ما اشتري جاهز )
المهم جان رقم غريب .. زين غريب شجاب رقمه يمي ؟
فتحت و كلت الو
صوت حاتاتي رقيق يكلي الو سعد؟
- لا نزل
- شنو ؟
- لا هيج هراتي المن من الكائنات الحية طالبه ؟
- سعد لو لا ؟
- لا عيني خطأ
المهم ما اطول السالفة عليكم لان ما شايل بلايس ,, خابرت مرة لخ و جانت كلش عصبية و اتكلي ابتليت طلبت رقم غلط خوما ابتليت ,, و بالكوة و من ورة خشمها عرفت انه اسمها ليلى و بيضة و عيونة ملونة (عبالي اسود و ابيض ) و شكرة و تشبه نانسي الزغبي و كالت بعد لا تخابر و سدت التلفون بقوة حسيت ايدها اتشنجت عبالك شايلة جدر دولمة و راكضة بي بالماراثون ,,,,,,,,,,,, طبعا ليلى اسم اكرهة لان حبيت مرة وحدة بهال اسم و ضربتني بوري و كلتلي امشي اطلع برة كلش مع انه جنة كاعدين بالسنتر يا برة هذا لا اعلم ... لهذا قررت ما اكول اسمها قابل راح يموع كرشي اذا نطقت ليلى
خابرت ثاني يوم لان صوتها ظل ببالي و كلت اذا اترزلت هال مرة اعوفها لكن و لسخرية الاقدار البنية جان مزاجها حلو و رحبت بيه و كعدت اتسولف و تضحك ولو لاحت صوتها شوية متغير مو ذاك الصوت اللي يدوخ عبالك دا احجي وية حباية فاليوم ,, بس اني عذرتها كلت يجوز شاربة سينالكو شي ,,,
و من وراها بدينة (قابل برجلينة ) نسولف و نحجي كلش هواية بكد خشمي من اعطس ,,, و اكتشفت من جملة الامور انه هي بنية (شنوو) قصدي انه هي طالبه بكلية و بنفس الوكت تدرس ,, طبعا ما لحيت على موضوع الشكل و العيون اللي كلتلي تفاصيلها باول تلفون و لا بموضوع ليش صوتها جان حلو كلش اول يوم لان شفتها حبابة البنية و السوالف حلوة وياها
اتفقنة انه نتشاوف ,, بس وين اشوفها هاية ,, اقترحت الميزانية مال بيتنة ساعة 5 جوة الفيز الثاني اللي مربوط بي الكيبل مال سخان مباشر ,, سوّت صوت يمكن عفطة نسائية ,, هي اقترحت بمطعم الساعة كتلها اكو مطعم 34 دقيقة صح اصغر بس اكلة اطيب ,, هم سوت صوت عبالك هدهد ديتريع ,, هي اقترحت اروحلها لجامعة بغداد فوافقت
و اني وية نفسي بديت احب اسم ليلى و انسى المستقبل (قصدي الماضي يا مستقبل) و بديت اتعلق بهال اسم و بديت افكر ,, حاتة حلوة و صوت _ جان حلو _ يلا مو مشكلة يجوز اتزوجها
وصفتلها جهرتي العظيمة و كعدت انتظرها يم مكان اتفقنا عليه و كتلها راح البس فانيلة رصاصي منقطة باسود ,, رادت شي يوضح اكثر بعد ان نبهتني انه الفانيلة هي اصلا انفزبل عليها cover اللي هو القميص بالطبع فوصفتلها ملابسي و كعدت انتظر
- هلاااااو محشش مكرش هاو ار يو ؟؟؟
- سلام قول من رب رحيم ,,,, انصرفي ,, لج انتي منو ؟؟؟
على غفلة شفت كدامي ممم هو فدشي اي اتذكر جان فدشي لان شفت بي ظل غطة 4 سيارات بالبارك ,, اي اي و سمينة ,, لدرجة فكرت اخذ تاكسي حتى افتر داير مدايرها فرة وحدة ,, و حولة يمكن لان باوعت على اللي دا اتسلم عليه (المفروض اني ) لكيت شجرة مال نبك ,,, سودة عبالك مليفة بفحمة
- اختي الله يخليج عندي موعد وية بنية تجي تشوفج شتكول ؟ عال عموم الحمام 400 متر بالسطح مال ذيج البناية
- لك يا حمام يا مطبخ انتة مو محشش و متواعدين بال 12 هنا شبسرعة نسيت حياتي
حسيت اطرافي جمدت عبالك حاضن روسي , و سالتها بصوت ناصي كلش راد يضرب الكاع
- انتي منو ؟
- اني سماح
- انور ؟
- لك سماح اللي صارلك شهر تحجي وياها بالتلفون
سالتها و تقريبا دا ابجي
- لعد ليلى الحاتة منو ؟
- هااااااااااااااااا ليلى ,,,, ليلى صديقتي اللي خابرتك بالغلط من موبايلي على خطيبها سعد لان ما جان عدها رصيد و ,,,, محشش شبيك ؟ ابو كرش يا عالم الحكونة الولد ازرك و راح يموت كام يطلع شي اصفر من خشمة محشش يا عالم يا عالم الوووووووووو
موضوع: السلام على انتو 
الجمعة يونيو 01, 2012 4:24 am
